قصيدة "آه …وآه يا وطن" للشاعر محمد جابر متولى عضو نادى ادب أسيوط
كتبهابهاء توفيق ، في 13 مارس 2008 الساعة: 20:33 م
"آه …وآه يا وطن"
مفتتح:
"واو"…و"ط"….ونون"
"ح"…و"لام"…و"ميم"
"واو"….و"ض"….و"ألف"…و"عين"
واحلامك
بتنزل زى
دمع برئ
على خدك
وقدامك
تلاقى
حلم-حلم
حزين
بيتساقط
من الشجرة
اللى قلعوها
على بابك
بتجرى
جوه جنبات المكان
وتنوح
وتنده
آه….وآه يا وطن
تشيل العتمه
على كتفك
وتمشى تبيع
مواويلك
"ياليل يا عين
على امبارح
وامتى يا بكره
هتجينا
تشيل
من قلبنا الجارح"
تغنى ..تغنى
ما تغنى
ما تلقى لا شارى
ولا بايع
تبيع البيعة
ما اتباعت
وباعوا الكلمة
من حلقك
سلام على حقنا
زحقك
تروح من تانى
نستأذن
لغات مشغولة
علشانك
حروف الخوف
بيتكلم وينده
آه وآه يا وطن
رايات الصبح
محروقة
بيد الليل
على قلبك
رمادها
زهور بتتخبى
من الاشعار
عشان تحبى وتتنفس
رمادها
"منسى" يتعلم
يعيش لو مرة
مش ميت
رمادها
قلب عصفورة
حزين
يتمنى لو يقدر
يطير بجاح
ولو واحد
لحد طريق
مالوش اخر
رمادها يا صاحبى
اسئلتك
عن البنوتة والشايب
وكيف اللعب
والنايب
وامتى الباب
بيتوارب
وكيف الواد بيتعلم
يسيب البنت
واللعبة
لحكم الجوكر
الشايب
يتوه فى سطور
اسئلتك
زيرمى جوه اوجاعك
حروف مجروحة
وبتنزف وتنده
آه…وآه يا وطن
***
وشوش الناس
ما هيش
باينه
من التوهة
وريحة الصمت
مالياهم
وقلقانة حروف
"الواو"…و "ط"…و "النون"
ما بين الصمت
والتوهة
وحيرانة
ما بين شريانك
الساخن
وبين مواويلم
الضايعة
حروف قلقانة
حيرانة
تساورى يا صاحبى
اسئلتك
عن الوطن اللى فى الادراج
والوطن اللى كان ابراج
تعالى يا صاحبى
نتوضى
ونقرا الفاتحة
ونصلى
صلاة الميت الغايب
ونستنى ولادة
حلمنا المجروح
محمد جابر متولى
ـــــــــــــــــــــــــــــــــــــــــــــــــــــــــ
التصنيفات : أدباء أسيوط | السمات:أدباء أسيوط
أرسل الإدراج | دوّن الإدراج
