نفسى فى ولد

للشاعر: احمد عبد الواحد

لو ارضى معتادة الحبل…

طب ليه ما تولدشى

وان ارضى ولدت ولد

طب ليه ما بيعشى

يا ارضى نفسى فى ولد

منك وراجل بطل

عاشق لطمى النيل

ينحت فى صخر الجبل

حالف برغم الليل..

يكسر حدود الملل

يقدر يصحى الناس

يعمل معاهم عمل

يا ارضى نفسى فى ولد

فلاح ومصرى فصيح

يعزق ينضف مليح

اسطى فى ارضه وريس

يبدر تقاوى بصحيح

يبدر تقاوى كويس

تطرح بوادر تصيح

تطرح ولاد ورجال

اصغر ولد مولود

لو لحظة دمه يسيح

يفتل بدمه حبال

يجدل حباله يمد

لجل  البعيد ينطال

***

بيقولوا يا سادة

عن ارض ولادة

لكنها  بأحوال….

ساعة بتولد بطل

وساعات كتير اندال

يا ارضى نفسى فى ولد

عمره ما يطلب مدد

بالين او بدولار

وان مره طال الخوف

اوعشنا بيه فى ضلام

يقدر بقلبه يشوف

يخلق له الف نهار

***

يا ارضى نفسى فى ولد

طيب قوى وحنون

عمره ما يرضى يخون

عمره ما يرضى يكون

شخشيخه هفيه

حافظ دروس التاريخ

لهلوبه ومذاكر

عارف حدود القضيه

وان غيره خان اوباع

عمره ما يرضى يبيع

 مصرى لحد النخاع

 وبيكره التطبيع

***

يا ارضى نفسى فى ولد

مجدع ماهوش فاجر

 يقدر يصون العرض

يحمى حدود الارض

 يكره يكون تاجر

فيا تحبلى مظبوط

ويا تولدى مظبوط

يا تجيبى مم الاخر

 وتفضلى عاقر

احمد عبد الواحد

القوصية